រដ្ឋបាលខេត្តសៀមរាប បានចេញសេចក្តីជូនដំណឹងមួយកាលពីថ្ងៃទី១២ តុលាកន្លងទៅ ចំពោះការរៀបចំពិធីប្រណាំងទូកងនៅឆ្នាំនេះ។ តាមរយៈសេចក្តីជូនដំណឹងនោះ រដ្ឋបាលខេត្តសៀមរាប បានកំណត់យកថ្ងៃទី១៣ និង១៤ វិច្ឆកា សម្រាប់រៀបចំការប្រណាំងទូកនៅទឹកស្ទឹងសៀមរាប។
ទីតាំងប្រណាំងទូក គឺដូចរាល់ដង ដែលចាប់ពីចន្លោះស្ពានថ្មមុខព្រះរាជដំណាក់ ទៅដល់គោលដៅស្ពានថ្មវត្តរាជបូព៌។ ក្នុងនោះដែរ នៅរាត្រីថ្ងៃទី១៤ ចាប់ពីម៉ោង ៧ ដល់ម៉ោង ១២ នឹងមានរៀបចំកម្មវិធីកម្សាន្តប្លែកៗ ពិធីបុកអំបុក សំពះព្រះខែ និងដង្ហែរប្រទីប តាមបរិវេណមហាសណ្ឋាគារអង្គរ ឫGrand’s Angkor និងនៅតាមស្ទឹងសៀមរាប ទីតាំងប្រកួត។
រដ្ឋបាលខេត្តសៀមរាប ក៏បានជូនដំណឹងពីការដាក់ពាក្យ និងទទួលពាក្យសុំចូលរួមប្រកួតប្រណាំងទូកងនេះផងដែរ។ អាជ្ញាធរ ឫស្ថាប័ន ដែលមានបំណងចូលរួមការប្រកួតនេះ គឺត្រូវទាក់ទងទៅក្រុមការងារ ឫគណៈកម្មការបច្ចេកទេស នៅសាលាខេត្តសៀមរាបផ្ទាល់៕
0 comments:
Post a Comment